Da passa 75 ani incà l sistem paritetich te scola

La scola paritetica, n ejëmpl dl multilingualità vivuda.

Tla valedes ladines dolomitiches, che ie do la rata desman, se muova la scola bele da giut incà tl raport de tenscion danter l naziunalism talian y chël tudësch, cun descuscions contraverses. Cieche ie segur ie che n ne à mei cunscidrà sun mesura i bujëns y la rejons dla pitla mendranza ladina. 

Na prima pruposta per na scola paritetica ladina ie unida fata da na pitla grupa de zitadins che univa ora dal ciamp dla scola y dl’aministrazion, che se à ancuntà tl 1945 a Picolin per abiné na soluzion che tenisse cont di bujëns y dla cuestions particuleres che tacova adum cun la scola per i ladins. Ai 27 de agost dl 1948 iel unì dat ora na urdenanza dal minister talian Guido Gonella, cun chël che l nasciova l model de scola paritetich tla scola elementera de Gherdëina y dla Val Badia.  

Pra l model paritetich che ie n droa tla scoles dla valedes ladines, vën una na pert dl nseniamënt fat per talian, l’autra pert per tudësch. Permò do l ann 1948 vën la rujeneda ladina tëuta ite tl nseniamënt. Tl prim fòvel mé puecia ëures al ann. Chësc model de scola dassova fé avëi n balanz danter la rujenedes de nseniamënt talian y tudësch y dé tl medemo mumënt n cuntribut per l mantenimënt y svilup dla rujeneda y cultura ladina. L manejamënt cris ora se à desmustrà drët: ti passa 75 ani passei iel unit a s‘l dé na didatica plurilinguala particulera, che porta a na cumpetënza scialdi granda pra la sculées y i sculeies, coche l vën nce for inò desmustrà da evaluazions periodiches.  

La scola paritetica à dal ann 1975 incà na si Ntendënza, dal 1987 incà nce n si Istitut Pedagogich, tramedoi cun sënta a Bulsan. Per la furmazion di nsenianc y dla nseniantes de rujeneda ladina iel unì metù su tl ann 1988 pra la Università Liedia de Bulsan na repartizion a pert tla strutura dla Scienzes de Furmazion a Persenon. Do l ann 2018 ie la Direzion de Furmazion y de Cultura Ladina unida urganiseda da nuef cun si repartizions y ufizies, for cun la finamira dan ai uedli de ti jì ancontra l plu che la va ai bujëns furmatifs tla valedes ladines y njenië ca material adatà per l nseniamënt te plu lingac. La scoles autes tla valedes ladines de Südtirol ie al mumënt la sëules tla provinzia de Bulsan che ie bones de njenië ca si sculeies per l niveau C1 dl ejam de trilinguism.  

L assessëur ladin per la scola di luesc ladins lauda duta chëles y duc chëi che à laurà y lëura tl ciamp dla scola, dantaldut per si gran mpëni: „Cun Vosc lëur de gran valuta, Vosc idealism y Vosta criatività à la scola di luesc ladins dla provinzia de Bulsan arjont l livel che la à ncuei, n ejëmpl dl multilingualità vivuda, che njënia ca la junanza per l daunì. Da oradecà nes cëli cun gran marueia y cunscidrazion!“ 

san/dl