Le Consëi provinzial

Ai 22 d’otober vëgnel lité danü le Consëi dla Provinzia autonoma da Balsan. Süa funziun prinzipala é da aprové les leges provinziales, mo nia ma …

Composiziun y funziuns dl Consëi dla Provinzia autonoma de Balsan 

Le Consëi dla Provinzia autonoma de Balsan é le Parlamënt dla provinzia. Al é l’organ plü alalt dla formaziun de orenté politica y tol dezijiuns importantes por la vita comunitara tl Südtirol. Al é metü adöm da 35 aconsiadësses y aconsiadus che vëgn litá por öna na legislatöra che döra de regola 5 agn. 

Che pó pa candidé por le Consëi provinzial? 

En linia de prinzip pó vigni zitadina y zitadin candidé por na sënta tl Consëi provinzial sce ara/al á bele complí 18 agn en le de dles lites, é scrita/scrit ite tles listes litales y á la residënza te n Comun dla Regiun Trentin-Südtirol en le de dla publicaziun dl decret de indiziun dles lites. 

Da chësc prinzip vëgnel tut fora por ejëmpl omboltes y ombolc de de majeri comuns y funzionares y funzionars de livel alt. Ares/ai mëss dé sö süa inciaria por che al vëgnes garantí les medemes oportunités danter che che candidëia.

Ciünes é pa les funziuns dl Consëi provinzial? 

La funziun prinzipala dl Consëi provinzial é la legislaziun: al aprovëia les leges provinziales che regolëia chës chestiuns che é, aladó dl Statut, de competënza dla Provinzia. N’atra funziun é la funziun de creaziun: al ti speta al Consëi provinzial da “cherié” la Junta provinziala litan le presidënt o la presidënta dla Provinzia y ince i assessurs y les assessuries. Surapró eserzitëia le Consëi provinzial ince na funziun de control sön l’ativité dla Junta provinziala, sciöche ince na funziun de cooperaziun ti don diretives politiches ala Junta provinziala. Al Consëi provinzial ti spetel ciamó d’atres funziuns danterater nominaziuns y designaziuns y scomenciadies por mudé le Statut de autonomia. 

Co laora pa le Consëi provinzial? 

Les aconsiadësses y i aconsiadus eserzitëia vigni de süa funziun lauran fora propostes politiches y documënc sön la basa de sües inciaries y dl barat cun les zitadines y i zitadins. Sciöche indunada generala di 35 aconsiadus y aconsiadësses röia adöm le Consëi provinzial de regola trëi o cater dis al mëis. Dailó vëgnel traté y aprové ac politics desvalis: dessëgns de lege, moziuns, interogaziuns ... 

Tl tëmp danter chëstes sentades plenares s’abina les comisciuns: ares é de mëndri grups de laur spezialisá te materies spezifiches olache aconsiadësses y aconsiadus fej laurs preliminars por les sentades plenares.

Le Consëi provinzial vëgn rapresenté dal presidënt o dala presidënta dl Consëi provinzial che presidiëia danterater les sentades plenares. Por la pröma mesa pert dla legislatöra vëgnel lité/vëgnera litada danter les aconsiadësses y i aconsiadus dl grup linguistich todësch, por la secunda mesa pert danter chi dl grup linguistich talian. Sce la maioranza dles aconsiadësses y di aconsiadus de vigni grup linguistich é a öna pól ince gní lité n’aconsiadëssa o n aconsiadú dl grup linguistich ladin. 

L’Ofize de presidënza sostëgn le presidënt o la presidënta dl Consëi provinzial. De chësc fejel ince pert dui vizepresidënc/döes vizepresidëntes y trëi secreters cuesturs/secreteries cuesturies. Tl Ofize de presidënza vëgnel rapresenté düc i grups linguistics y la mendranza politica.

red