“A visionary at altitude”

Do Cortina y Plan de Corones, gëura a Milan la mostra fotografica de Stefano Zardini dedicheda ai piunieres dl sport da d’inviern y ai Juesc Olimpics de Cortina 1956.

Spartida su te trëi sëntes de espusizion defrëntes, lieia la mostra adum - cun i medemi pultrec spetaculeres - trëi luesc iconics y i trëi raions ulache l vën tenì la garejedes olimpiches: Cortina d’Ampëz, Antholz y Milan.

L opres dl fotograf ampezan Stefano Zardini ie metudes ora tla galaria Ikonos a Ampëz, tl Museum LUMEN de Plan de Corones y ti locai storics de Fabbrica del vapore de Milan. L proiet “A visionary at altitude / N vijionar sö alalt” ie unì tëut ite ufizialmënter tl program culturel dla Olimpiades Milan - Cortina 2026, cun l patrozine dla Provinzia Autonoma de Bulsan, dla Region Trentin y Südtirol, dl Chemun de Milan y dl Chemun de Cortina d’Ampëz.

Trëi tematiches. La fotografies metudes ora raida ntëur a trëi tematiches: The Pioneers Passion (La pasciun di pioniers), nasciuda dal gran archif de fotografies de familia, ulache l autëur trasfurmea la vedla fotografies te n cheder cuntemporan tres ntervënc cromatics y grafics te na verscion pop; Snowland (Raiun dla nëi) che zelebrea te na maniera particulera la pizes dolomitiches, ududes coche n parch dai juesc enorm; y Tracce (Fostüs), ulache la chëutra de nëif vën ududa coche na gran tëila artistica, sun chëla che i schiadëures, magari nce zënza savëi, lascia si fusties, coche la testemunianza de si passà.

I lëures de Zardini lieia adum la memoria storica y la vijion artistica. La fotografies de archif di prims ani dl 1900, nterpretedes da nuef te na maniera pop, dà de reviers energia y atualità: i prim schiadëures, la raides cun l bob, l’eleganza dl jadiné artistich, y la ntraunides da snait sun la pizes blances devënta de drë’ icones cuntemporanes, plëines de faszinazion y de vijion sun l daunì. Perchël iel fotografies storiches y opres pop urigineles che mët a jì n dialogh danter passà y prejënt, mo deplù sce n cunscidrea che na sezion dla mostra ie dedicheda ala Olimpiades da d’inviern de Cortina tl 1956. N omaje al spirt piunieristich dla jënt da mont de dan 100 ani, y n lecort merità dl epos olimpich de 70 ani, pultrec che reprejentea simbolicamënter l passaje dl testemone ai Juesc Olimpics dl 2026. N bel catalogh scrit per ladin y nglëisc mantën l lecort dla trëi espusizions de A visionary at altitude / N vijionar sö alalt, che resterà daviertes al publich nchin a mez auril.

cs/tk