Artejanat da inlaota, n laur sfadius

Ciaré pro y pié a man.

Le museum dles usanzes y dles tradiziuns se arjigna bele ca al isté: le banch da feur, le züber da lavé guant, le torá vëgn controlá, le cënder de fagher tl mogun vëgn abiné adöm por fá lisciüa. Chësc vëgn fat, deache le museum ti dedicará indô i dis da laur de messé y d’agost al artejanat da inlaota. 

Les vijitadësses y i vijitadus dl museum ará la poscibilité da ti ciaré pro a esperc dl’ert deperpo ch’ai laora y da gní alsavëi val’ deplü sura le vedl artejanat. Ai podará daidé para canche les lavadësses mëss bate les ciamëjes cun la marzora o stricoré fora y tëne i linzos. I dis canche le martel bat söl ancügn, canch’al vëgn fat drap o zaindli o canche l’ega cöj tla sehte dal guant gnará lasciá alsavëi adora assá söla plata internet dl museum.