Él mo bele massa tert?

Ambiënt y mudamënc climatics

Mostra straordinara sön le mudamënt dl clima. La mostra straordinara da iniann „Countdown to Mass Extinction?“ tl Museum Ladin é dedicada al mudamënt dl clima, chël dl passé y chël d’aldedaincö. Ala fin dl tëmp dl Perm dan da 252 miliuns d’agn á eruziuns vulcaniches tla Siberia gaujé la maiú catastrofa dla storia dla tera. Chëstes eruziuns dorâ n miliun d’agn y curî na spersa tan grana co i Stac Unis d’America cun n strat da un fina trëi chilometri de lava. Insciö rovâ cuantités enormes de CO2 tl’atmosfera, che gaujâ n scialdamënt estrem dl planët. Incër le 96 porcënt di organisms dl mer y le 70 porcënt di tiers sön la tera morî. Les dimenjiuns de chësta desdruziun de massa ê trö plü granes co chëra che á fat morí fora i dinosaurs dan da 66 miliuns d’agn. Les temperatöres romagnô altes fina dî do les eruziuns vulcaniches y la vita metô indô man pormó do 5 miliuns d’agn. Chësc avenimënt mostra baldi sö tröpes paraleles cun la crisa climatica gaujada dala porsona aldedaincö. Porchël se dá jö la secunda pert dla mostra cun le mudamënt climatich da sëgn. Dala revoluziun industriala incá é le CO2 contignü tl’atmosfera aumenté da 280 ppm a 423 ppm. I viun na ona de cialt indolater y porchël messunse nes damané: é mo le countdown bele pié ia?

hp