La Junta provinziala

La lita ne stabilësc nia ma ci aconsiadus y ci aconsiadësses de ci partí che rovará tl Consëi provinzial. Ara determinëa ince la composiziun dla Junta provinziala.

Ci fej pa la Junta provinziala? 

La Junta provinziala é l'organ esecutif, chël ó dí l'organ d'esecuziun dla Provinzia. Ara á danterater le dovëi da aprové regolamënc d’esecuziun por les leges provinziales, aprové ordinanzes y mené les ativités aministratives por les chestiuns de interes provinzial. La lege provinziala sön les lites (lp 14/2017) vëiga danfora che al fejes pert dla Junta provinziala altamo 7 y alplü 10 assessurs y assessuries y le presidënt o la presidënta dla Provinzia. Le presidënt o la presidënta dla Provinzia ti surandá ales assessuries y ai assessurs provinziai ciamps por chi che ai surantolará la responsabilité politica ti proscimi agn.

Ci faziun á pa les lites dl Consëi provinzial sön la Junta provinziala? 

Ai 22 d’otober lita la jënt dl Südtirol che pó lité, i 35 componënc dl Consëi provinzial nü. Dedô vëgnel lité danter les aconsiadësses y i aconsiadus litá le presidënt o la presidënta dla Provinzia. De regola se tratera dl pröm candidat o dla pröma candidata dl partí che á arjunt le majer numer de sëntes tl Consëi provinzial. 

Chësta o chësc ti proponn al Consëi provinzial i componënc dla Junta provinziala, che vëgn spo litá dal Consëi provinzial te na lita socrëta cun la maioranza assoluta. Le Consëi provinzial chir ince fora i dui o trëi assessurs o assessuries litá che surantol l'inciaria de vizepresidënt o vizepresidënta dla Provinzia. 

Tan de componënc che al é tla Junta provinziala vëgn fat fora tla detlaraziun de govern. Pro la composiziun él da tigní cunt dl grup linguistich y dl ses: tramidui mëss ester en relaziun a süa forza tl Consëi provinzial (canche al vëgn cherdé ite le pröm iade).

red