Sot al sëni di aniei

I Juesc Olimpics da d'inviern dl 2026 lascerà nce n sëni culturel: l'UNIKA tol pert.

"Cultural Olympiad - The Arts Programm", chësc ie l inuem dl program de sustëni culturel per i Juesc Olimpics da d'inviern de Milan - Cortina dl 2026. L fin ie chël de comuniché i valores olimpics y paralimpics tres n proiet multidiscipliner cunlian cultura, tradizion y sport y de festejé la criatività coche rujeneda universela. Dan y ntan i Juesc Olimpics vën nce pità n cuntribut artistich dala plataforma di artisć de Gherdëina UNIKA. "Nëus tulon pert al'Olimpiades cultureles da d'inviern cun doi proiec artistics", conta la coordinadëura Heidi Rungger. "Nosc fin ie de mëter tl zënter la tradizion viva dl ziplé y de dé n cuntribut culturel ai Juesc Olimpics da d'inviern."

"Wooden Fans" de grandëza naturela. Per chësta ucajion vën de reviers y fans cunesciui, fac de lën de lim - cincanta scultures de grandëza naturela fates a man dai artisć dl'UNIKA, che ie unides uneredes cun l Marketing Award de Südtirol tl 2004. I artisć dl'UNIKA ie tl lëur de crië cin' figures nueves per i Juesc Olimpics da d'inviern dl 2026: ëi reprejentea i aniei olimpics coche nce la cin' valedes ladines y lieia sport, ert y tradizion. I modiei de chisc lëures nueves ie unic prejentei per l prim iede pra la mostra UNIKA de chëst ann a Urtijëi a metà setëmber. Chësta figures, deberieda cun chëles che ie bele, trajerà l'atenzion di vijitadëures pra la garejedes de biathlon a Antholz.
Recunziliazion de Armin Grunt. Pra la olimpiada culturela fej nce pert la scultura "Recunziliazion" dl artist dl'UNIKA Armin Grunt, na uneranza simbolica ai Juesc Olimpics da d'inviern. La basa dl'opra d'ert ie n ciuch de lën dedite uet, che simbolisea la natura y l cunliamënt danter la persona y si ntëurvia. Ntëur al ciuch iel na grupa de scultures, che reprejentea energia, vijion y contradizions dl'umanità y nvieia l vijitadëur a n viac fisich y simbolich de reviers ala urigines. L'opra d'ert unirà inaugureda ai 26 de nuvëmber dl 2025 sun Plaza de Chemun a Bulsan y sarà da udëi a Bulsan nchin che la flama olimpica unirà purteda ai 26 de jené dl 2026.

tk