Valivanza sun ciamp y tla vita

Giuana Prugger ie trainadëura de juech al palé te Gherdëina. Si storia desmostra ciuldì che l respet y la parità de tratamënt ie tan mpurtanc tl sport.

Vint mutans danter set y ot ani se ale-nea sun l ciamp de juech al palé te Gherdëina. I ciavei ciulei adum a na maniera sportiva, dutes danter set y ot ani. Les fej pert dla scuadra U8 dl FC Gherdëina, che tol chëst’ann per l prim iede pert a la partides, dantaldut contra mutons, pervia dla mancianza de scuadres de mutans te Südtirol. Nce si trainadëura Giuana Prugger (33) ie dl post, si pascion per chësc sport à bele scumencià canche la ova ot ani. Si cariera dl juech al palé la à purteda dal FC Vahrn al FC Bayern München nchin ti USA. Do avëi studià sport a Dispruch iela inò unida de reviers y à sëurantëut na scuadra de mutons te Gherdëina. Ma si streda da trainadëura ne fova nia for saurida.

“N valguna persones fova scetiches tl prim”, conta Giuana. Dantaldut un mumënt ne se ala nia desmincià. Te si prim ann àla alenà na scuadra de pitli mutons: “Nosta prima partida ons perdù 16:0 contra l'autra scuadra. N valgun peresc ne se l'à nia tëuta su massa bën.” Chël che la à ntlëuta audì fova dut auter che paroles de sustëni: “Ciuldì muessa pa n'ëila alené mi mut?”o “Cie possen pa se aspité da na trainadëura ëila?” Ma l ie tosc unit a lum che si alenamënt ne fova te deguna maniera manco bon de chël de si colegs ëi. Nsci à Giuana menà la scuadra cun suzes per passa cin'ani.

Respet tla interazions da uni di. Promuever na interazion respetëusa tla scuadra ie un di duvieres plu mpurtanc de n trainadëur, dij Prugger: “Uniun dëssa avëi la medema pusciblteies per desmustré si capaziteies; uni cumëmber dla scuadra à l mesun de jughé unfat giut.” Datrai, do avëi perdù na partida, vën n cumpani de scuadra tenì sëul respunsabl per la desfata. “Chël ne vën assolutamënter nia tolerà. Canche l suzed nsci zeche, chërdi adum duta la scuadra y l vën rujenà de chësc deberieda. Na scuadra lëura mé bën deberieda, perchël ne n'iel degun pont a dé gaujes.”

La valivanza dla pusciblteies per ëiles y ëi tl medemo sport ie per Giuana scialdi mpurtanta. “L'ëi-les muessa suvënz dé scialdi deplù per avëi suzes. Chësc ie dantaldut da udëi ti ciamps che vën duminei dai ëi coche l juech al palé”, dij Giuana. “La scuadra dla mutans giapa suvënz l trainadëur che fossa scenó jit a cësa a mans uetes, ciamps manco biei y orars de training ncompri.” Ma co dëssa pa la mutans avëi la medema pusciblteies de suzes te de tel cundizions?

“Respet uel dì per me che la mutans dëssa pudëi fé sport y unì azetedes avisa sciche i mutons. Chësc tol nce ite l ntujiasm per i sport defrënc zënza i tlassifiché coche sport de ëi o de ëiles,” sotrissea la trainadëura. Aldò de Giuana possen mé crië n ambient de respet sce duc vën tratei a na maniera valiva giatan la medema pusciblteies.

Cialé l Video

so/tk